Адкрыццё выставы «Перазоў стагоддзяў: 1812-2012» у Мінскай гарадской ратушы

25 кастрычніка адбылося адкрыццё выставы «Перазоў стагоддзяў: 1812-2012» у Мінскай гарадской ратушы. У залах галерэі , дзе 200 год таму іграў гарадскі аркестр, зараз размясціліся працы мастакоў, прысвечаныя тэме вайны 1812 года. Каля 40 карцін жывапісцаў з Беларусі, Расіі, Украіны і скульптурныя кампазіцыі беларускіх аўтараў у чарговы раз заклікаюць гледачоў задумацца пра вайну і мір, пра гісторыю сваёй зямлі, прымушаюць аддаць даніну загінуўшым.

Урачыстую цырымонію адкрыў фільм «Перазоў стагоддзяў: 1812-2012» Вольгі Свірыдавай і Сямёна Шаўцова, які распавядае пра тое, як ствараліся карціны, цяпер прадстаўленыя шырокаму гледачу, і які з'яўляецца своеасаблівым роздумам аўтараў над тэмай усяго праекта.

Глядзець відэафільм

Віталі гасцей дырэктар Музея гісторыі горада Мінска Галіна Ладзісава, намеснік кіраўніка Расійскага цэнтра навукі і культуры ў Мінску, першы сакратар Пасольства Расійскай Федэрацыі ў Рэспубліцы Беларусь Алена Маслава, дырэктар Грамадскай арганізацыі «Беларускі зялёны крыж» Уладзімір Шаўцоў, кіраўнік групы жывапісцаў, якія прымалі ўдзел у праекце «Перазоў стагоддзяў: 1812-2012», выкладчык Магілёўскай гарадской дзіцячай мастацкай школы Дзмітрый Пухоўскі.

На адкрыцці выставы прысутнічалі многія аўтары. Момант, калі кіраўнік групы Дзмітрый Пухоўскі перадаў свайму падапечнаму Юрыю Сяргейчыку афішу з Юрыным пейзажам «Праз стагоддзі», даў адчуць усёй публіцы ў зале тую ўзаемную павагу, творчае яднанне, якія праціналі ўвесь працэс працы мастакоў.

Стварэнню асаблівай атмасферы ў выставачных залах спрыяла і з'яўленне гасцей з клуба-сядзібы «Бівак», якія прыехалі ў касцюмах часоў напалеонаўскіх войнаў. Пад гукі класічнай музыкі, якую выконвалі дзяўчыны-удзельніцы струннага квартэта «Кадэ», павольна перасоўваліся сярод гледачоў бравы гусар і паненка ў наймаднейшай сукенцы 1812 года.

А скончылася цырымонія тэатральнай пастановай-роздумам пра Напалеона і вайну 1812 года «Ішоў снег» рэжысёраў Таццяны Шылавай (Узорны тэатр-студыя «Клас-А!» Мінскай гімназіі № 74) і Ліліі Шабуневіч (франкафонны тэатр «Кляртэ»). Маладыя акцёры прадставілі невялікі спектакль, напоўнены гукамі музыкі таго часу, запалам маладых асоб. На французскай, беларускай і рускай мовах разважалі яны пра тыя пытанні, якія ставіць перад намі вайна 1812 года.

Глядзець відэарэпартаж з цырымоніі

Глядзець экспазіцыю

Выстава будзе праходзіць у будынку Мінскай гарадской ратушы да 30 лістапада 2012 года.